SLR, West Japan may misyon
MANILA, Philippines — Ikalawang sunod na panalo ang kapwa target ng Sta. Lucia Lady Realtors at West Japan All-Stars sa kanilang paghaharap sa ikalawang araw ng 2020 Philippine Superliga-Mayor Maliksi Super Cup sa Imus Sports Complex sa Cavite.
Magtatapat ang dalawang tropa ngayong alas-5 ng hapon matapos ang tapatan ng Cignal HD Spikers at Generika-Ayala Lifesavers sa alas-3 ng hapon.
Nanggulat ang bagong bihis na Sta. Lucia nang takasan ang Lifesavers sa kanilang five-set thriller, 19-25, 27-25, 18-25, 25-21, 17-15, para kunin ang unang panalo sa three-day tournament.
Sumandal ang tropa kina Shainah Joseph, Mika Reyes, Jessica Vestal, Honey Royse Tubino at Rubie de Leon para sa kanilang tagumpay.
Para sa panig naman ng West Japan, dominanteng performance ang kanilang ipinakita para durugin ang HD Spikersvia straight sets, 25-16, 25-14, 25-10, at ilista ang unang panalo sa torneo.
Hindi pinagpawisan ang Japanese club team sa naging laban na binaderahan nina Nozomi Hattori, Hikari Minato, Yukiho Hara, Ayuko Fukuda, Aika Hayashida at Mina Hagashi.
Ang nasabing pre-season tournament ay binuo ng PSL at pamahalaang bayan ng Imus para bigyan ng tulong ang mga evacuees na nasalanta ng pagputok ng Taal Volcano.
- Latest
