Vargas is the man

MILAN – Nangingiti na lang ang mga miyembro ng PBA board kapag nababalikan nila ang pagtatapos ng PBA Season 42.

Ito ay masalimuot na panahon kung saan muntik nang mahati sa dalawang liga ang PBA dahil sa nahati ang PBA board sa isyu ng termino noon ni commissioner Chito Narvasa.

Pinamumunuan ng SMC teams ang isang bloc samantalang nasa kabilang side ang MVP teams at mga kapanalig nito.

Kinailangang bumalik at muling pamunuan ni Ricky Vargas ang board para umusad muli ang PBA.

Fast-forward sa panahong ito, solidong-solido na muli ang PBA board at nagkakaisa sa paghatag ng programang lalong magpapasigla sa PBA at makakapag-entertain sa PBA fans.

Dahil masaya ang halos lahat sa liderato ni Vargas, minabuti na nilang itigil ang rotation sa paghawak ng PBA chairmanship. Dahil dito, sa ikatlong sunod na PBA season, mananatiling si Vargas ang nasa timon ng liga.

“He has really united the board. There’s a commonality in our goals which has made the PBA more inclusive with all its programs,” pahayag ni Bobby Rosales, ang incoming vice chairman mula sa Columbian Dyip.

“By being inclusive, the PBA has now extended its reach to everybody who loves basketball. Based on our programs, our out of town games, we’re trying to reach out to other places. And at the end of the day, it redounds to the benefit of the basketball players,” dagdag ni Rosales.

Isa pang nakinabang ay ang national team program ng Samahang Basketbol ng Pilipinas.

Sa pamumuno ni Vargas at katuwang si PBA commissioner Willie Marcial, maganda ang relasyon ng pro league at ang national cage federation sa pamumuno naman ni Al Panlilio.

“It helps in developing and preparing the Gilas team, especially for the World Cup which we’re hosting in 2023,” ani Rosales.