Arellano hangad masolo ang liderato kontra sa San Beda
MANILA, Philippines — Tatangkaing maitala ng Arellano University Lady Chiefs ang ikalimang sunod na panalo at patatagin ang kapit sa liderato sa pagbangga sa San Beda Lady Red Spikers sa NCAA season 95 women’s volleyball sa The Arena sa San Juan City.
Makahaharap ng defending champions ang Lady Red Spikers ngayong alas-12 ng tanghali at susundan ng tapatang Jose Rizal University Lady Bombers at Perpetual Help Lady Altas sa alas-2 ng hapon.
Naiposte ng Lady Chiefs ang ikaapat na sunod na panalo nang padapain ang San Sebastian Lady Stags, 25-17, 25-18, 25-27, 25-13, noong Sabado na nagdala sa kanila sa tuktok ng standings kasalo ang St. Benide.
Napanatili man ang malinis na 4-0 marka ay kailangan pa rin ng tropa na mas pagtuunan ng pansin ang kanilang kondisyon at mapaganda pa ang ipinakita nila sa huling laro.
“Siguro pag-usapan lang namin kung ano ‘yung dapat gawin. Magiging mahaba ang usapan namin regarding sa inilaro namin. Iyon naman ang kailangan tapos tamang pahinga lang siguro,” wika ni Arellano coach Obet Javier na ibabanderang muli sina Regine Arocha, Necole Ebuen, Princess Bello, Carla Donato at Mikaela Juanich.
Napalakas naman ng San Beda ang kapit sa ikatlong puwesto matapos iposte ang 24-26, 25-19, 25-18, 25-17 tagumpay kontra sa Letran Lady Knights kamakailan.
Aminado si Lady Red Spikers head coach Nemesio Gavino na isa ang floor defense sa bentahe ng Arellano.
“Ang lakas ng floor defense nila (Arellano). Ang hirap nilang mabagsakan ng bola. Iyong floor defense nila ang matibay. Champion team ‘yun, mahirap talagang kalaban. So prepare lang kami nang maayos,” ani Nemesio na sasandalan sina Cesca Racraquin, Nieza at Jieza Viray, Kim Manzano, Trisha Paras at Robyn Matias.
Maglalaro rin ang juniors at men’s teams na sisimulan ng laban ng Arellano at San Beda sa alas-8:30 at sa alas-10 ng umaga at sa alas-3:30 at alas-5 ng hapon ang JRU at Perpetual.
- Latest