San Miguel markado sa Philippine Cup

MANILA, Philippines — Kagaya ng nakaraang limang taon, muling tatangkain ng 11 pang koponan na talunin ang five-time champions San Miguel sa darating na 2020 PBA Philippine Cup.

Isa na rito ang Barangay Ginebra na idineklara ang kanilang kahandaan na angkinin ang titulo ng season-opening conference na magsisimula sa Marso 1.

Matapos makopo ang kanilang ikatlo sa huling PBA Governor’s Cup title ay sinabi ni Gin Kings head coach Tim Cone na gusto naman nilang makuha ang korona ng PBA Philippine Cup.

“Any coach in the PBA naman talagang target ang team namin dahil naka-five-peat (Philippine Cup) na kami,” sabi ni Beermen mentor Leo Austria. “Kaya iyon talaga goal ng bawat coach. What more si coach Tim (Cone)? Dahil iyong team naman niya talaga namang contender. Any conference contender iyon.”

Ang Ginebra ang sumira sa pangarap ng San Miguel para sa ikalawang PBA Grand Slam matapos sibakin ang koponan ni Austria sa kanilang quarterfinals match ng 2019 PBA Governor’s Cup.

Hangad ngayon ng Beermen na maidiretso sa anim ang kanilang pagdomina sa All-Filipino tournament sa likod nina five-time PBA MVP June Mar Fajardo, one-time PBA MVP Arwind Santos, Terrence Romeo, Alex Cabagnot, Chris Ross at Marcio Lassiter.

“Five-peat mahirap nang mapanta-yan iyan, lalung-lalo na ‘yung six-peat,” wika ni Austria.

Samantala, pinalagda ng NorthPort si No. 8 overall pick at dating Adamson Falcons forward Sean Manganti sa isang two-year contract. Nauna nang binigyan ng Batang Pier si second round selection Renzo Subido ng isang one-year deal kamakalawa.

Pinapirma rin ng Rain or Shine sina No. 7 pick Prince Rivero at se-cond rounder Vince Tolentino sa kani-kanilang two-year contract.