Pacquiao laban kay McGregor?

MANILA, Philippines — Bukas ang pintuan ng kampo ni eight-division world champion Manny Pacquiao na makaharap si Ultimate Fighting Championship (UFC) star Conor McGregor sa isang title fight.

Ito ang inihayag ng grupo ni Pacquiao matapos isiwalat ni McGregor na nagkaroon ito ng negosasyon para harapin ang Pinoy champion sa laban.

“If someone wanted to [fight] the Senator, why not? Conor is a good boxer,” ani MP Promotions chief Sean Gibbons.

Ngunit nilinaw ni Gibbons na mas nakatuon ang atensiyon ni Pacquiao na makalaban ang pinakamahuhusay na welterweight boxers sa kanyang nakatakdang World Boxing Association (WBA) title defense sa Abril.

“Right now, the Senator is still concentrating on the best 147-pounders in the world.  Just looking for the best business for the Senator,” ani Gibbons.

Wala pang pormal na anunsiyo kung sino ang sunod na makakalaban ni Pacquiao kung saan nangungunang kandidato sina Danny Garcia, Mikey Garcia, Shawn Porter at Errol Spence Jr. – ang apat na matitikas na boksingero sa mundo sa welterweight class.

Nauna nang inihayag ni McGregor sa isang pa-nayam na gumulong ang negosasyon para makalaban nito si Pacquiao.

Ngunit walang malinaw na statement si McGregor kung bakit hindi ito natuloy.

“We’re actually close to signing Manny. There was an offer made on that, yeah, just not yet. [It’s going to happen] very much so. I’m going to get a boxing title soon,” ani McGregor.

Umugong ang pa-ngalan ni McGregor nang makaharap nito si undefeated American fighter Floyd Mayweather Jr. noong 2017.

Hindi umubra ang lakas ni McGregor nang lasapin nito ang 10th-round technical knockout loss kay Mayweather sa T-Mobile Arena sa Las Vegas, Nevada.

Tiwala si McGregor na matatalo nito si Mayweather sa oras na muling magkrus ang kanilang landas.