76ers pinadapa ang Celtics; Thunder iniligpit ang Rockets
PHILADELPHIA — Tinipon ni head coach Brett Brown ang kanyang tropa sa locker room para patunugin ang postgame victory bell nang makita niya ang telepono ni general manager Elton Brand.
Nasa FaceTime si star center Joel Embiid na tumatawag mula sa New York kung saan siya nakatakdang sumailalim sa surgery para ayusin ang torn ligament.
“We’re going to miss Joel for however long it is,” sabi ni guard Ben Simmons. “But tonight was a good start.”
Umiskor si Josh Richardson ng 29 points, habang may 19 markers si Simmons para akayin ang 76ers sa 109-98 paggiba sa Boston Celtics.
Inaasahang hindi makakalaro si Embiid, may mga averages na 23.4 points at 12.3 rebounds sa 31 games ngayong season, ng isa hanggang dalawang linggo.
Napunit ang radial collateral ligament ni Embiid sa kanyang ring finger sa panalo ng Philadelphia laban sa Oklahoma City noong Lunes.
Pinamunuan ni guard Kemba Walker ang Celtics mula sa kanyang 26 points.
Sa Oklahoma City, diniskaril ng Thunder ang pagbabalik ni Russell Westbrook matapos talunin ang Houston Rockets, 113-92.
Nagtala si forward Danilo Gallinari ng 23 points at 11 rebounds at may 20 markers si Shai Gilgeous-Alexander para sa Oklahoma City.
Umiskor naman si Westbrook, ang two-time scoring champion habang naglalaro para sa Thunder, ng 34 points para sa Rockets.
Dinala ng Oklahoma City si Westbrook sa Houston kapalit ni Chris Paul at ilang draft picks.
Nalimitahan naman si James Harden sa 17 points, mababa sa kanyang league-best 38.5 points per game, mula sa 5-for-17 fieldgoal shooting.
Sa Minneapolis, kumamada si Andrew Wiggins ng 23 points at nagtala si Gorgui Dieng ng 12 points at 10 rebounds para sa 116-102 pagdaig ng Minnesota Timberwolves sa Portland Trail Blazers.
Binanderahan ni Damian Lillard ang Blazers mula sa kanyang 20 points at 13 assists at nagdagdag sina CJ McCollum at Hassan Whiteside ng tig-15 points.
Sa Detroit, kumonekta si Kevin Love ng tiebreaking 3-pointer sa huling 37.9 segundo sa overtime at iginiya ang Cleveland Cavaliers sa 115-112 panalo laban sa Pistons.
Tinapos ng Cavaliers ang kanilang five-game losing skid.
Humataw si Tristan Thompson ng 35 points.
- Latest