Lakers bumangon mula sa four-game losing skid
PORTLAND, Oregon -- Humataw si Kyle Kuzma ng 24 points, habang kumolekta si LeBron James ng 21 points at 16 assists para igiya ang Los Angeles Lakers sa 128-120 pagpapatumba sa Trail Blazers.
Tinapos ng Los Angeles ang kanilang season-long four-game losing skid.
Pinamunuan ni Kuzma ang mga Lakers’ reserves na kumamada ng kabuuang 72 bench points kumpara sa 36 markers ng Blazers.
“The players, the coaching staff, everyone that’s involved in this, we’re competitors: We don’t want to lose,” sabi ni James matapos ang laro. “You just try to make up for it. You have a great opportunity. You have 24 hours, 48 hours or sometimes 72 hours to make amends and be better. And we were better tonight than we were on Christmas.”
Tumapos naman si star forward Anthony Davis na may 20 points at 9 rebounds.
Binanderahan ni Damian Lillard ang Portland, nalasap ang ikatlong dikit na kamalasan, mula sa kanyang game-high na 31 points.
Humakot si center Hassan Whiteside ng 19 points at 16 boards para sa Blazers, iniwanan ng Lakers matapos ang third quarter, 103-95.
Ang dunk ni Davis mula sa lob pass ni James ang nagbigay sa Los Angeles ng 127-115 abante sa huling 1:37 minuto ng fourth period.
Sa Milwaukee, muling inihatid ni Khris Middleton sa panalo ang NBA-leading Bucks matapos talunin ang Orlando Magic, 111-110.
Umiskor si Middleton ng 21 points para saluhin ang trabaho ni Milwaukee superstar forward Giannis Antetokounmpo (back soreness).
Sa Miami, isinalpak ni Jimmy Butler ang isang free throw sa huling 2.3 segundo sa overtime para akayin ang Heat sa 117-116 paglusot kontra sa Philadelphia 76ers.
Matapos itabla ni Ben Simmons ang Philadelphia sa 116-116 sa nalalabing 18.3 segundo sa extra period ay nakahugot naman ng foul si Butler sa posesyon ng Miami.
Nagtala si Butler ng 25 points, 9 assists at 9 rebounds para sa panalo ng Heat.
Sa San Francisco, itinala ni Luka Doncic ang kanyang pang-siyam na triple-double ngayong season para ihatid ang Dallas Mavericks sa 141-121 panalo laban sa Golden State Warriors.
Tumapos si Doncic na may 31 points, 15 assists at 12 rebounds para banderahan ang Mavericks.
Kumonekta si Tim Hardaway Jr. ng anim na 3-pointers para sa kanyang 25 points, at may 18 markers si forward Kristaps Porzingis kasama ang apat na triples para sa Dallas.
Pinamunuan ni point guard D’Angelo Russell ang Golden State mula sa kanyang 35 points.
- Latest
