Tolentino hihikayatin ang Vietnam na isama ang arnis, dancesports at obstacle course sa 2021 SEAG
MANILA, Philippines – Dadalasan ni Philippine Olympic Committee president Abraham “Bambol” Tolentino ang pagbisita sa Vietnam simula sa susunod na taon upang ligawan ang bansa para maidagdag ang ibang sports na llamado ang Pilipinas sa 2021 Southeast Asian Games.
Kung maaari at kung ito ang kailangan para mapapayag ang Vietnam ay linggo-linggo ang magiging pagdayo ni Tolentino sa Hanoi para sa misyong mapanatili ang tagumpay ng bansa sa SEA Games.
“Next year, every week pupunta na akong Vietnam para manligaw to appeal na please included naman (iyong sports natin) kahit 3, 2 or 1 sport lang,” ani Tolentino sa ginanap na POC General Assembly isang linggo matapos ang 30th SEA Games.
Naghayag ang Vietnam na 36 sports ang nasa program nila para sa 2021 edisyon ng biennial meet.
Una dito ang mga mandatory sports na athletics at swimming na nasa Category 1 habang swak din ang mga Olympic at Asian Games sports katulad ng basketball, volleyball, football, weightlifting, tennis, badminton, gymnastics at iba pa sa Category 2.
Kasali rin ang native Vietnamese sports na vovinam, finswimming at ang esports.
Idudulog ni Tolentino na maisali ang arnis, dancesports at obstacle course racing na siyang dinomina ng Pinas sa nakaraang SEA Games.
Humakot ang bansa ng 14 ginto sa arnis, 10 sa dancesports at 6 sa OCR na malaking bahagi ng overall championship ng Pilipinas sa unang pagkakataon matapos noong 2005 na pinamahalaan din ng bansa.
- Latest