Basilan, Biñan lusot sa mga nakalaban

MANILA, Philippines — Natakasan ng Basilan at Biñan ang mahigpit na hamon ng mga nakalaban sa pagpapatuloy ng Mahar-lika Pilipinas Basketball League Lakan Season ka­makalawa sa Sta. Rosa Sports Stadium sa Laguna.

Iniligtas ni Dennis Daa ang Basilan Steel sa pa­mamagitan ng kanyang buzzer-beating jumper upang takasan ang Saran­ga­ni Province, 85-82.

Ito ang kanilang ika-anim na sunod na panalo upang umakyat sa solo fourth place sa sou­thern division ng 31-team league na suportado na nga­yon ng Chooks To Go.

May pagkakataon ang Marlins na dalhin sa overtime ang laro ngunit ang des­peration shot ni Jorem Morada ay hindi pumasok.

Tumapos si Daa ng 15 points at 9 rebounds sa likod ng double-double ni Cris Dumapig na may 15 points at 18 rebounds na nag-angat sa Basilan sa 15-8 sa likod ng Da­vao Occidental (19-3), Ba­coor (18-5) at General Santos (15-7).

Pinigilan naman ng Biñan City Luxxe White Krah ang malaking rally ng Imus Bandera para sa 88-83 panalo.

Dumikit ang Bandera sa 75-77 ngunit umiskor ng magkasunod na tres sina Jayjay Helterbrand at  artistang si Gerald Anderson para ilayo ang Biñan.