Ladon, Suarez pasok sa boxing semifinals
MANILA, Philippines — Nagtala ng magkaibang panalo sina Olympian Rogen Ladon at 2014 Asian Games silver medallist Charly Suarez para makapasok sa semifinals ng 2019 Southeast Asian Games boxing competitions kahapon sa PICC Forum sa Pasay City.
Naitakas ni Ladon ang 4-1 majority decision win laban kay Aldoms Sugoro ng Indonesia sa men’s flyweight division.
Hindi nagpadalos-dalos si Ladon kung saan pinag-aralan muna nito ang galaw ng kanyang karibal bago ito pulbusin sa huling yugto ng laban.
”Pinag-aaralan muna namin ‘yung kalaban. Matibay din ‘yun. Isa siya sa pinakamatibay kong kalaban saka ‘yung Thailand,” ani Ladon na silver medallist sa 2018 Asian Games sa Jakarta, Indonesia.
“Masaya ako nakuha ko ‘yung laban ko. Tuluy- tuloy lang. Nandito tayo sa hometown natin ipakita natin ‘yung galing natin,” dagdag ni Ladon.
Sa kabilang banda, magarbo ang entrada ni Suarez sa kumpetisyon matapos itarak ang second-round re-feree-stopped-contest laban kay Min Arkar Paing ng Myanmar sa men’s lightweight category.
Makakasama nina Ladon at Suarez sa semis sina dating world champion Josie Gabuco, Aira Villegas, Irish Magno at Carlo Paalam na nauna nang nagtala ng magkakaibang panalo.
Pinatumba ni Gabuco si Raksat Chuthamat ng Thailand, 4-1, sa women’s light flyweight habang nanaig naman si Aira Villegas kay Vongphachan Vilayphone ng Laos, 5-0, sa women’s bantamweight.
Namayani naman si Magno kay Hui Xin Yee Leona ng Malaysia, 5-0, sa women’s flyweight at nanalo si Paalam kay Khamsathone Khamphouvanh ng Laos, 5-0, sa men’s light flyweight.
- Latest