Phl Spikers asam ang win No. 3

MANILA, Philippines — Puntirya ng national team na masungkit ang top seeding sa Group B sa pagharap nito sa 2017 silver medallist Indonesia sa pagpapatuloy ng 2019 Southeast Asian Games men’s volleyball tournament ngayong araw sa Philsports Arena sa Pasig City.

Magtutuos ang Pinoys at Indons sa alas-6 ng gabi matapos ang duwelo ng reigning champion Thailand at Myanmar sa ala-una ng hapon at ng Vietnam at Cambodia sa alas-3:30.

Magkasalo ang Pilipinas at Indonesia sa liderato sa Group B hawak ang parehong 2-0 marka.

Ngunit pakay ng Pinoy spikers na makuha ang importanteng panalo para makaiwas sa powerhouse Thailand sa crossover semifinals.

Magkasosyo rin ang Thailand at Myanmar sa Group A tangan ang magkatulad na 1-0 marka. Parehong tinalo ng Thailand at Myanmar ang Singapore.

Sa women’s division, hindi umubra ang lakas ng Pinay spikers sa powerhouse Thailand, 25-16, 25-22, 34-32, upang mahulog sa 0-2 rekord.