Azkals bigo; draw sa water polo

MANILA, Philippines — Magkaibang resulta ang nairehistro ng men’s football at men’s water polo teams sa pagpapatuloy ng 2019 Southeast Asian Games na pormal nang magbubukas sa Sabado sa Philippine Arena sa Bocaue, Bulacan.

Bigong makahirit ng panalo ang Azkals matapos lasapin ang 1-2 desisyon laban sa powerhouse Myanmar kahapon sa Rizal Memorial Football Stadium sa Malate, Manila.

Nakuha ng Myanmar ang unang goal matapos makatakas si Aung Kang Man sa matinding depensa ng Azkals sa ika-16 minuto ng laban para makuha ang 1-0 kalamangan.

Hindi agad sumuko ang Azkals nang ikarga ni Justin Baas ang isang umaatikabong goal sa ika-45 minuto sa tulong nina midfielder Yrick Gallantes at Dennis Chung para maitabla ang iskor sa 1-1 sa pagtatapos ng first half.

Gitgitan ang laban sa second half bago nakuha ni Win Naing Tung ang winning goal ng Myanmar sa ika-79 minuto para tulu-yang makuha ang panalo.

Dahil dito, nahulog ang Pilipinas sa ikaapat na puwesto sa Group A hawak ang isang puntos habang umangat sa unahan ang Myanmar tangan ang apat na puntos mula sa isang panalo at isang draw.

Sunod na makakasagupa ng Pilipinas ang Malaysia sa Biyernes sa alas-8 ng gabi sa parehong venue.

Tanging ang dalawang mangungunang koponan lamang sa bawat grupo ang papasok sa semifinals.

Sa men’s water polo, naitakas ng Pinoy squad ang 6-6 draw kontra sa 2017 SEA Games silver medallist Indonesia sa New Clark City Aquatics Center sa Capas, Tarlac.

Sa katunayan, baon ang Pilipinas sa 5-6 iskor sa huling kanto ng laro ngunit nagawang makahirit ng Pinoys ng goal sa huling sandali ng laro para maipuwersa ang draw.

Galing ang krusyal na goals kina Vincent Sicat at Paolo Serrano.

“This was a big result considering it was Indonesia, the 2017 silver medal winner,” ani national team head coach Rey Galang.

Nakalinya pa sa makakalaban ng Pilipinas ang Malaysia, Thailand at nagdedepensang Singapore.

Ipinatutupad ang single-round robin format kung saan ang mangungunang koponan ang magkakamit ng ginto habang pilak at tanso naman sa dalawang sunod na tropa.