Tigresses kampeon sa UAAP table tennis

MANILA, Philippines — Nagbanat ng buto ang paboritong University of Santo Tomas para igupo ang first-time finalist na Ateneo sa dalawang ties para makopo ang 13th UAAP Women’s table ten­nis title sa Blue Eagle Gym.

“Masaya kasi ang pi­naka-aim ng UST is mag-champion both men’s and women’s. And the wo­men’s they did not let it go; fight pa rin sila kahit lamang na ‘yung kalaban,” sabi ni head coach Lorinda Wadjad.

Pinaghirapan ni Tigress Paddler Danica Al­bu­ro ang dalawang match points mula kay Lady Eagle Kathleene Bulaquena para ipanalo ang UST sa 14-12 sa fifth set ng deci­ding singles match sa afternoon tie.

Nauna nang nagbanta ang Ateneo na pahabain ang series nang iangat ni­na eventual-Rookie of the Year Kaela Aguilar at kapwa newbie Ann Borbon ang team sa 2-0.

Tinalo ni Aguilar si Sherlyn Gabisay sa five sets, habang naungusan ni Borbon si Ciara Derecho sa apat na sets.

Ngunit naitakas naman nina Leigh Villanue­va at Emery Digamon ang Tigresses sa doubles match sa 12-10, 11-7, 5-11, 11-8.

Sa deciding singles sa umaga, tinalo ni Shaeena Ronquillo si Bulaquena, 11-9 para kunin nang 1-0 series lead para sa UST.