Manila, Basilan nagpalakas
Lamitan, Basilan, Philippines — Nagpalakas ang Manila Stars at Basilan Steel para sa kanilang asam na top four finish at masusubukan ang kanilang mga bagong players ngayon sa pagharap sa magkahiwalay na kalaban sa pagpapatuloy ng Maharlika Pilipinas Basketball League Lakan Season sa Lamitan Capitol Gym.
Malakas na ang Stars ngunit kinuha pa rin nila si Mac Tallo kaya paborito silang manalo laban sa Imus Bandera sa alas-6:30 ng gabing laban.
Bukod sa homecourt advantage, karagdagang lakas sa Steel ang bagitong si Allyn Bulanadi sa pagharap sa Nueva Ecija Vanguards sa alas-8:30 ng gabi.
Kung ang Manila ay sigurado na sa eight-team playoffs sa kanilang 16-3 record sa North division, nangangailangan pa ang Basilan (12-8) ng ilang panalo para makausad sa South division playoffs.
At malaking tulong si Bulanadi sa Jumbo Plastics-supported Steel nina Sumisip Mayor Julz Hataman, ARMM Gov. Mujiv Hataman and co-owner Hegem Furigay na nais ipakita na ang Basilan ay isang mapayapa, tourism-oriented at sports loving na probinsiya.
Certified gunner ang kaliweteng 6-foot-3 forward mula sa San Sebastian College sa kanyang career-high 44 points para sa Stags na naihatid niya sa National Collegiate Athletic Association Final Four bago sinibak ng Letran Knights.
Ang Bandera (5-15), ipaparada sina Gerald Anderson at dating PBA MVP Jayjay Helterbrand, at ang Rice Vanguards (5-14) ay delikadong masibak.
- Latest
