‘Di malala ang injury ni Jeron Teng
MANILA,Philippines — Nakahinga nang maluwag ang Alaska Aces matapos makaiwas sa isang malalang injury si Jeron Teng at inaasahang makakabalik pa sa idinaraos na 2019 PBA Governors’ Cup.
Sa resulta ng kanyang examination, hyperextended knee lamang ang natamo ni Teng matapos bumagsak sa huling laban ng Aces kontra sa Phoenix noong Miyerkules at mawawala siya ng hanggang dalawang linggo.
Nakabanggaan ni Teng si big man Justin Chua sa huling minuto at hindi na nakabalik sa laro.
Nagtala siya ng 17 points at 8 rebounds sa 105-102 panalo ng Alaska na binuhay ang pag-asang makasampa sa season-ending conference playoffs.
Kagagaling lamang ni Teng sa hamstring injury bago ang simula ng torneo kaya’t hindi nakalaro sa unang limang laban ng Aces na nagresulta lahat sa kabiguan.
Sa kanyang pagbabalik ay naakay ni Teng, sa likod ng kanyang rehistrong 15.0 points, 7.8 rebounds at 3.0 assists, sa apat na panalo sa limang laro ang Alaska upang umangat sila sa 4-6 baraha sa ikapitong puwesto.
Hindi makakalaro si Teng sa hu-ling laban ng Aces kontra sa lider na NLEX sa Nobyembre 20 subalit inaasahang puwede na ulit sumalang sa playoffs kung papasok ang Alaska lalo’t magkakaroon ng break ang PBA para sa 30th Southeast Asian Games.
Nakatakda ang SEA Games sa Nobyembre 30 hanggang Disyembre 11 na pamamahalan ng bansa.
- Latest