Portland aasa kay Melo

PORTLAND— Umaasa ang Trail Blazers na matutulungan sila ni veteran forward Carmelo Anthony, ang 19th-leading scorer sa NBA history, na makara-ting sa NBA Finals ngayong season.

Pumayag ang 35-anyos na si Anthony sa isang non-guaranteed contract sa Portland, may 4-8 record ngayon matapos ang 106-114-home loss sa Toronto Raptors noong Miyerkules.

Nakita lamang si Anthony sa 10 games para sa Houston Rockets sa pagsisimula ng nakaraang 2018-19 season.

Huli siyang sumabak sa aksyon noong Nobyembre 8, 2018 kung saan siya nagtala ng 1-for-11 fieldgoal shooting at tumapos na may 2 points sa 80-98 pagkatalo ng Rockets laban sa Oklahoma City Thunder.

Matapos ito ay dinala ng Rockets si Anthony sa Chicago Bulls noong Enero 22 kapalit ng salapi at dalawang European players.

Noong Pebrero 1 ay binitawan naman siya ng Bulls.

Isang 10-time All-Star, si Anthony ang scoring champion ng NBA noong 2012-13 kung saan siya nagtala ng average na 28.7 points para sa New York Knicks.

Ang third overall pick ng Denver noong 2003 draft, naglaro si Anthony para sa Nuggets ng 7 1/2 seasons bago siya ibinigay sa Knicks noong Pebrero ng 2011 sa isang three-team trade sangkot din ang Minnesota Timberwolves.

Nagtala si Anthony ng 25,551 career points sa ilalim ng 32,806 ni LeBron James sa hanay ng mga active players.

Mayroon siyang career average na 24.01 points per game para sa No. 19 sa NBA history.