Gymnastics team pumitas ng 2 golds
MANILA, Philippines — Nagpasiklab ang women’s national gymnastics team nang magbulsa ng dalawang gold medal sa 2019 Magic Cup Rhythmic Gymnastics Meet sa Hungary.
Ipinamalas ng 13-anyos na si Breanna Labadan ang impresibong performance upang mangibabaw sa Junior Individual All Around at angkinin ang unang gintong medalya ng Pilipinas sa torneo.
Hindi rin nagpahuli si Daniela Reggie dela Pisa na sumiguro ng gintong medalya sa Senior Individual All Around event.
Magandang pambungad ito para sa 16-anyos na si dela Pisa na sasabak sa 2019 Southeast Asian Games na gaganapin sa Nobyembre 30 hanggang Disyembre 11 sa iba’t ibang panig ng bansa.
Noong Hunyo ay nakapag-uwi si dela Pisa ng dalawang silver medals sa clubs at ribbon events sa nilahukang Singapore Open.
Si dela Pisa ay anak nina dating University of Visayas Lancers basketball player Randy at gymnastics mentor Darlene.
Sa kabilang banda, maningning na nasundan ni Labadan ang impresibong ipinamalas nito sa RG Friends Masters Gymnastics Meet sa Denmark.
Nakaginto rin si Labadan sa Individual All Around.
Umani rin siya ng pilak sa Ball at tanso sa Ribbon sa Royal Crown na idinaos sa Greece.
- Latest
