Phl team giniba ang PSL Team Shine
MANILA, Philippines — Gamit ang kanilang mga natutuhan sa training camp sa Tokyo, Japan, agarang nanalasa ang Philippine women’s national volleyball team nang talunin ang PSL Team Shine, 25-14, 25-18, 25-16, sa Philippine Superliga (PSL) Super Cup kahapon sa The Arena sa San Juan City.
Umariba para sa Nationals si Mylene Paat nang nagrehistro ng 8 points sa likod ng 6 attacks at 2 kill blocks, habang nag-ambag ng tig-7 markers sina Ces Molina at Majoy Baron.
Nagtala sina Jovelyn Gonzaga at Eya Laure ng tig-6 points at may 5 markers si Maddie Madayag.
Hindi man kumpleto dahil wala sina Alyssa Valdez at Jia Morado ay nagawa pa ring umalagwa ng Nationals para simulan ng malakas ang kanilang kampanya sa three-day tourney.
Sa first set pa lamang ay rumatsada na kaagad ang tropa ng 8-0 atake at itarak ang 13-4 bentahe at palubugin ang Team Shine sa 24-13 patungo sa set win.
Si Sta. Lucia outside hitter MJ Phillips ang nanguna sa Team Shine sa kanyang 8 puntos.
- Latest
