Aces binalasa ang Batang Pier

MANILA, Philippines — Hindi sapat ang career-high na 37 points ni Christian Standhardinger para ipanalo ang NorthPort.

Dumiretso ang Alaska Aces sa kanilang pa­nga­la­wang sunod na pana­lo ma­tapos gibain ang Ba­tang Pier, 106-99 panalo sa 2019 PBA Gover­nor’s Cup kahapon sa Smart Ara­­­neta Co­liseum.

Umiskor sina import Franko House at Vic Ma­nuel ng tig-23 points para itaas ang kartada ng Alaska sa 3-6 at buhayin ang ka­nilang tsansa sa eight-team quarterfinal round.

Nagwakas naman ang two-game winning run ng NorthPort, nakahugot kay import Michael Qualls ng 35 points at 15 rebounds, sa 3-5.

Humakot din si Standhardinger ng 16 boards at 5 assists para sa tropa ni coach Pido Jarencio.

Ang layup ni Manuel ang nagtaas sa Aces sa 98-89 sa 3:09 minuto ng fourth period bago ito naputol ni Qualls para ilapit ang Batang Pier sa 92-98 sa huling 2:18 minuto.

Sa pagbandera ni Stand­hardinger ay muling na­kadikit ang NorthPort sa 99-102 sa natitirang 27.6 segundo ng laro.

Ngunit tumipa si Ma­nuel ng dalawang free throws para selyuhan ang pa­­nalo ng Alaska.