Mayweather dedma sa patutsada nina Pacquiao at Jack Ma

MANILA, Philippines — Ipinagkibit-balikat lamang ni undefeated American fighter Floyd Mayweather, Jr. ang inilabas na ha­mon nina billionaire Jack Ma at eight-division world champion Manny Pacquiao.

Walang ideya si Mayweather kung sino si Jack Ma kaya’t dedma lang siya sa mga patutsada ng Chinese businessman at ng Pinoy champion.

“Who?! I don’t even know who he is! I know what he (Pacquiao) says, I know what he says. He says when you finally face me, I’ll beat him,” wika ni Mayweather sa inilabas na Instagram post ni Pacquiao.

Nauna nang naglabas ng video si Pacquiao kasama si Jack Ma para hamunin si Mayweather.

“Floyd Mayweather if you want a real fight, fight me. If you want an exhibition, my guy, my friend Jack Ma will take care of you. They real Manny team,” sabi ni Pacquiao.

Sinegundahan pa ito ni Jack Ma sa pagsasabing han­da siyang labanan si Mayweather.

 “Yeah, I’m ready anytime, anyplace. Manny team is ready,” ani Jack Ma.

Walang pormal na sagot si Mayweather kung kakasa ito sa rematch.

Ngunit mismong si Pacquiao na ang nagkumpirma na may negosasyong nagaganap upang matuloy ang muling pagtutuos ng dalawang pinakamainit na boksingero sa mundo.

Pinaniniwalaan pa ng ilang eksperto na tila bahagi ito ng promosyon sakaling matuloy ang laban.

Paraan umano ito upang pulsuhan ang boxing fans kung interesado ang mga ito sa rematch.

Inaasahang tatabo sa takilya ang Pacquiao-Mayweather II dahil mismong ang mga fans na ang sumi­sigaw ng rematch.

Nakaabang lamang ang buong mundo kung matutuloy ito o hindi.