Castro hindi malubha ang naging injury
MANILA,Philippines — Nakahinga ng maluwag ang TNT Katropa matapos makaiwas sa seryosong injury si Jayson Castro.
Kinumpirma ni team manager Gabby Cui kahapon na soleus muscle strain injury lamang sa kanang ankle ang natamo ni Castro sa 116-123 kabiguan ng Tropang Texters laban sa NLEX Road Warriors.
Taliwas ito sa inakalang Achilles strain na kakailanganin sana ng ilang buwan na pahinga na pipigil kay Castro na makatulong sa kampanya ng TNT Katropa sa season-ending conference at gayundin sa 30th Southeast Asian Games para sa Gilas Pilipinas.
Ayon sa Tropang Texters, kailangan lamang magpahinga ni Castro ng tatlo hanggang apat na linggo.
Nadale si Castro ng injury sa first quarter ng laban ng TNT Katropa sa NLEX at hindi na siya nakabalik sa laro para ipatingin ang naturang injury.
Dahil sa magpapahinga rin ang PBA para sa nalalapit na SEA Games mula sa Nobyembre 30 hanggang Disyembre 11 ay inaasahan ang malakas na pagbabalik ng veteran point guard para sa Tropang Texters.
Inaasahan ding puwede pa ring makapaglaro si Castro sa biennial tourney lalo’t sa Disyembre 4 hanggang 10 pa magaganap ang basketball competition.
Nasa 15-man Gilas Pilipinas pool ni coach Tim Cone si Castro kasama sina LA Tenorio, Chris Ross, Stanley Pringle at Scottie Thompson, Marcio Lassiter, Matthew Wright, Art Dela Cruz, RR Pogoy, Troy Rosario, Vic Manuel, Greg Slaughter, June Mar Fajardo at Japeth Aguilar.
- Latest
