Bucks nanalo sa Rockets; Clippers wagi sa Warriors
HOUSTON — Nang makuha ni Giannis Antetokounmpo ang kanyang ikaanim at huling foul sa huling limang minuto ng laro ay hindi nawalan ng loob ang Milwaukee Bucks.
“These guys in this locker room, we’re fighters, we’re competitors,” sabi ni guard Wesley Matthews. “If Giannis fouls out we can’t just come into the locker room.”
Nagposte ng triple-double si Antetokounmpo mula sa kanyang 30 points, 13 rebounds at 11 assists para pamunuan ang Bucks sa 117-111 paggupo sa Rockets sa larong nagtampok sa tatlong NBA MVPs.
Humanga si Antetokounmpo, ang MVP sa nakaraang season, sa kanyang mga teammates sa krusyal na bahagi ng laro.
Nagsalpak si Brook Lopez ng dalawang free throws sa huling minuto ng laro, habang tumipa si Ersan Ilyasova ng isang jump shot sa natitirang 15 segundo para selyuhan ang panalo ng Milwaukee.
Nagtala naman si Russell Westbrook, ang 2017 MVP, ng 24 points, 16 rebounds at 7 assists para pamunuan ang Houston, habang nagsumite si James Harden, ang 2018 MVP, ng 19 points, 14 assists at 7 rebounds.
Sa San Francisco, diniskaril ni Kawhi Leonard ang unang laro ng Golden State Warriors sa bago nilang Chase Center nang kumana ng 21 points sa 141-122 panalo ng Los Angeles Clippers.
Nagtala rin ang NBA Finals MVP na si Leonard ng 9 assists sa ikalawa niyang laro para sa Clippers matapos igiya ang Toronto Raptors sa NBA crown sa kanilang six-game finals series ng Warriors.
Umiskor naman si Stephen Curry ng 23 points at may 20 markers si D’Angelo Russell para sa Golden State.
Sa Detroit, nagpasabog si Trae Young ng 38 points para akayin ang Atlanta Hawks sa 117-100 panalo sa Pistons.
Humakot si John Collins ng 20 points at 10 rebounds, habang naglista si Jabari Parker ng 18 points para sa Hawks.
Pinamunuan ni guard Derrick Rose ang Pistons mula sa kanyang 27 points at kumabig si star center Andre Drummond ng 21 points at 12 rebounds.
- Latest