50 points pambuena-mano ni Irving sa Brooklyn

NEW YORK – Nagpasabog si star guard Kyrie Irving ng 50 points sa kanyang record-setting Brooklyn Nets debut, ngunit nawalan siya ng balanse at naimintis ang potensyal na winning shot.

Ang resulta nito ay ang 127-126 overtime win ng Minnesota Timberwolves.

Humakot si Karl-Anthony Towns ng 36 points at 14 rebounds para sa Timberwolves, habang nagtala si Andrew Wiggins ng 21 points tinambakan ng go-ahead basket sa huling 1:19 minuto ng laro.

Matapos ang Nets timeout ay nasa kamay ni Irving ang bola para sa posibleng panalo ng bago niyang koponan. Inubos niya ang oras at sinimulang kumilos para sa isang salaksak bago siya nawalan ng balanse malapit sa foul line.

Napanatili niya ang kanyang dribble, nakatayo subalit naimintis ang krusyal na jumper.

Sinira ni Irving ang record ni Kiki Vandeweghe para sa most points ng isang player sa una niyang laro para sa bagong tropa.

Umiskor si Vandeweghe ng 47 markers para sa Portland noong Oktubre 27, 1984.

Sa Salt Lake City, nag-lista si guard Donovan Mitchell ng 32 points at 12 rebounds para akayin ang Utah Jazz sa 100-95 panalo laban sa Oklahoma City Thunder.

Tumipa si Mitchell ng 22 markers sa second half para sa Jazz, nakahugot kay Bojan Bogdanovic ng 16 points at 14 boards kay Rudy Gobert.

Sa Miami, nagtala si Justise Winslow ng 27 points, 7 rebounds at 7 assists, habang nagdagdag si rookie Kendrick Nunn ng 24 markers sa kanyang NBA debut para sa 120-101 paggupo ng Heat sa Memphis Grizzlies.