NLEX habol ang twice-to-beat

MANILA, Philippines — Ang mga koponang papasok sa Top Four sa eight-team quarterfinal round ay magkakaroon ng ‘twice-to-beat’ advantage.

Ito ang gustong makuha ni NLEX coach Yeng Guiao sa kanilang pagsagupa sa Columbian ngayong alas-4:30 ng hapon kasunod ang pagtutuos ng nagdedepensang Magnolia at Blackwater sa alas-7 ng gabi sa 2019 PBA Governor’s Cup sa Ynares Center sa Antipolo City.

Para palakasin ang kanilang tsansa ay kinuha ng Road Warriors si NBA veteran Manny Harris para palitan si original import Olu Ashaolu.

Itinuturing itong sugal ni Guiao.

“I have two concerns coming into our game versus Columbian,” sabi ni Guiao. “First is that they’re a very dangerous team, one that’s getting better eve-ry game. Their confidence level is very high and they are co-ming together as a team. Second is ha-ving a new import and blending him with the team in a short period of time. We’re just hoping that we are able to defend their guards and import enough to minimize their efficiency.”

Naglaro ang 30-anyos na si Harris, dumating sa bansa noong Sabado, sa NBA para sa Cleveland Cavaliers, Los Angeles Lakers at Dallas Mavericks at kumampanya sa Ukraine, Greece, China at Turkey.

Parehong hangad ng Road Warriors at Dyip ang kani-kanilang ikalawang sunod na panalo.

Umaasa si Columbian mentor Johnedel Cardel na magiging bentahe nila ang pangangapa ni Harris sa istilo ng laro sa PBA.

“Siyempre, bago at hindi pa sanay dito sa PBA style of play kaya puwedeng maging disadvantage sa kanila iyon,” ani Cardel na muling sasandal kina import Khapri Alston, No. 1 overall pick CJ Perez, Rashawn McCarthy, Reden Celda at Jackson Corpuz laban kina Harris, Kiefer Ravena, JR Quinahan, Larry Fonacier at Jericho Cruz.

Samantala, mag-uunahan namang makabangon ang Hotshots at Elite mula sa kanilang 89-90 pagkatalo sa San Miguel Beermen at 90-102 pagyukod sa Dyip, ayon sa pagkakasunod.

Sinabi ni Magnolia combo guard Paul Lee na malaki pa ang kanilang tsansang makapasok sa Top Four sa quarterfinals. “Napag-usapan namin na hindi naman made-determine ‘yung championship run with just one game. So mahaba pa ‘yung conference. Marami pa namang games,” aniya.