16-man SEAG archery team intensibo ang paghahanda

MANILA, Philippines — Bigating international competitions ang lalahukan ng Philippine national archery team bilang paghahanda para sa darating na 30th Southeast Asian Games sa Nobyembre.

Sasabak ang 16-man archery team sa Asian Championships at sa Continental Olympic Qualifier na nakatakda sa susunod na buwan.

Kasalukuyang nagsasanay ang national squad sa F.R. Sevilla Archery Range sa Novaliches, Quezon City simula noong Setyembre matapos ang Asia Cup na nagsilbing SEA Games Archery test event sa Clark, Pampanga.

Magkakaroon ang national archery team ng two-week international training camp sa Nobyembre 6-21 sa Bangkok Thailand kung saan idaraos ang Asian Championships at Continental Olympic Qualifier sa Nobyembre 22-29.

Ang koponan ay ginagabayan nina national coaches Clint Sayo, Joy Marino at Foreign coach Chong Yap Lee ng Malaysia.

Ang men’s recurve team ay binubuo nina Luis Gabriel Moreno, Florante Matan, Jason Feliciano at Carson Hastie, habang ang distaff side ay kinabibilangan nina Kareel Meer Hongitan, Pia Elizabeth Bi-daure, Gabrielle Monica Bidaure at Phoebe Amistoso.

Nasa men’s compound team naman sina Paul Marton Dela Cruz, Johann Olano, Arnold Rojas at Robert Badiola at kinabibilangan nina Jennifer Chan, Andrea Robles, Rachelle Anne Dela Cruz at Abigail Tindugan ang women’s compound team.

Pinasalamatan ni archery secretary general Ròsendo Sombrio ang suporta ng Philippine Sports Commission.

“It is our duty to support the national athletes. The archery team is also a recipient of the PSC’s support as we prepare for the country’s hosting of the SEA Games in November to December,” wika ni PSC chairman Willam ‘Butch’ Ramirez.

Naniniwala si Sombrio na makakatudla ng gintong medalya ang mga national archers bagama’t inaasa-hang makakagawan nila sa karangalan ang mga atleta ng Thailand, Indonesia at Singapore.

Nakatakda ang 2019 SEA Games sa Nobyembre 30 hanggang Disyembre 11 sa iba’t ibang venues sa New Clark City sa Capas, Tarlac, Clark, Metro Manila at Tagaytay City.