Collegiate press corps NCAA player of the week

MANILA,Philippines — Nanatiling walang talo sa 17 laro ang three-peat champion San Beda Red Lions,  salamat sa tulong ni MVP leading candidate Calvin Oftana kaya napili ang beteranong foward bilang Chooks-to-Go Collegiate Press Coprs NCAA Player of the Week.

“Simple lang naman sinabi ko sa players ko noong halftime -  mahiya naman sila sa sarili nila.  They’ve been playing well for the first 16 games, then suddenly they will be different in the 17th,?” tanong ni San Beda coach Boyet Fernandez matapos maiwanan ang tropa sa first  half ng kanilang laro kontra sa St. Benilde Blazers noong Huwebes.

Ito na ang ikalawang weekly individual POW honor ni Oftana at tanging siya lamang ang nakadalawa sa season na ito.

Sa kanilang ikalawang panalo laban sa Blazers, 95-73, umani si Oftana ng 29 puntos, siyam na rebounds, limang assists at dalawang steals.

Ang one-point halftime deficit ang naging 72-58 bentahe sa third quarter matapos umiskor si Oftana ng 13 puntos na naging daan para sa malaking rally tungo sa isang laro na lamang mula sa asam na sweep sa double-round elimination.

Sa kabuuan nag-average si Oftana ng 14.6 puntos, 8.0 rebounds, 2.6 assists at 1.2 blocks kada laro para pangunahan ang MVP race sa NCAA Season 95.

Naungusan ni Oftana sina teammate James Kwekuteye, Noah Lugo ng Mapua, Allyn Bulanadi ng San Sebastian at Justin Gutang ng St. Benilde para sa lingguhang parangal.