Lyceum twice-to-beat na rin

MANILA, Philippines — Nasungkit ng Lyceum Pirates ang ikalawang semis twice-to-beat bentahe matapos muling pataubin ang JRU Heavy Bombers, 77-64, habang nilampaso muli ng Letran Knights ang Perpetual Help Altas, 88-69 upang pumasok sa Final Four kahapon sa pagpapatuloy ng Season 95 NCAA basketball tournament sa The Arena sa San Juan City.

Muling umarangkada si Jaycee Marcelino ng 23 puntos at limang rebounds at 15 puntos, sampung rebounds at dalawang blocks naman mula kay Mike Nzeusseu upang iangat ang Pirates sa 13-4 kartada at masiguro ang ikalawang puwesto sa likuran ng San Beda Red Lions (17-0) pagkatapos ng elimination round.

Tumulong din ng 10 puntos si Toci Tansingco, anim nito mula sa three-point area para sa kanilang paghahanda na rin sa huling laro kontra sa Red Lions ngayong Huwebes kung saan susubukan ng Lyceum na pigilan ang asam na sweep ng Mendiola-based team.

“It’s gonna be big big win for us to create momentum as we go to the stretch, kumbaga home stretch na ito ng season. Every opportunity for us to really learn and grow is gonna be big for us,” ayon kay Lyceum coach Topex Robinson.

Umani naman si Jerrick Balanza ng 18 puntos bago sa kanyang panglimang foul sa huling minuto ng ikaapat na yugto habang humataw si Christian Balagazay ng 5-of-5 shooting sa field goal para sa kabuuang 18 puntos sa 88-69 panalo ng Letran (11-6)  sa Perpetual (5-10) para makopo ang ikatlong semis berth.

Ang huling Final Four berth ay pag-aagawan pa ng San Sebastian Stags (9-7), Mapua Cardinals (8-8) at St. Benilde Blazers (7-9).

Sa juniors’ division, naka-eskapo ang Lyceum Junior Pirates sa mga kamay ng JRU Light Bombers, 70-69, upang lumapit sa Final Four sa 11-6 card habang nagwagi naman ang Perpetual Help Junior Altas laban sa Letran Red Ro-bins, 81-77 para umangat sa 6-10 slate.