Meralco kinuryente ang Phoenix
MANILA, Philippines — Nang masibak si head coach Louie Alas sa second period ay nawala rin sa laro ang Phoenix.
Sinamantala ito ng Meralco Bolts para patumbahin ang Fuel Masters, 111-94 at ilista ang kanilang ikalawang sunod na panalo sa 2019 PBA Governor’s Cup kahapon sa Smart Araneta Coliseum.
Itinaas ng Meralco ang kanilang kartada sa 3-1 para masolo ang ikaapat na puwesto habang nahulog naman ang Phoenix sa pang-apat nilang kabiguan sa 5-laro.
“Maganda ‘yung defense namin, maganda ‘yung offense namin, kumbaga nagtulungan lahat kami,” sabi ni guard Baser Amer, kumolekta ng 26 points, 4 assists at 4 steals. “Iyong Phoenix hindi naman mada-ling kalaban iyan eh. Sinabayan lang namin at binilisan namin ‘yung laro.”
Humakot si two-time PBA Best Import Allen Durham ng 27 markers, 12 rebounds at 3 assists habang nakumpleto ni Chris Newsome ang triple-double sa tinapos na 13 points, 12 boards at 11 assists.
Napatalsik si Alas sa 7:31 minuto ng second quarter matapos makuha ang ikalawang technical foul kung saan naghahabol ang Fuel Masters sa 25-32.
Isinara ng Bolts ang first half bitbit ang 52-37 abante bago umarangkada sa third period sa pagtatayo ng 72-48 kalamangan mula sa three-point shot ni Durham sa huling 3:39 minuto nito.
Lalo pang tinambakan ng Meralco ang Phoenix sa inilistang 27-point lead, 88-61, makaraang magsalpak si Nards Pinto ng dalawang magkahiwalay na triples sa gitna ng basket ni center Raymond Almazan sa 10:37 minuto ng final canto.
Ilang beses nagtangkang makalapit ang Fuel Masters, ngunit naroon sina Amer at Newsome para hadlangan ito.
- Latest