Meralco ibinaon pa lalo ang Alaska

MANILA, Philippines — Kahit nagpalit ng import ay hindi ito nakatulong sa Alaska.

Nagpasabog si point guard Baser Amer ng 27 points, tampok rito ang anim na three-point shots, para banderahan ang Meralco Bolts sa 101-75 paggiba sa Aces sa 2019 PBA Governor’s Cup kahapon sa MOA Arena sa Pasay City.

Humakot naman si two-time PBA Best Import Allen Durham ng 28 markers, 18 rebounds at 6 assists para sa ikalawang panalo ng Meralco at makatabla ang Columbian Dyip sa 2-1 marka sa ikatlong puwesto sa ilalim ng NLEX, TNT Katropa at San Miguel.

“Our defense in the second half was very, very good, particularly in the third period,” sabi ni one-time PBA Grand Slam champion coach Norman Black.

Nalasap naman ng Alaska, ipinarada si import Franko House, ang kanilang ikaapat na dikit na kamalasan para mabaon lalo sa ilalim ng team standings.

Tumapos si House, produkto ng NCAA Division 1 school na Ball State University, na may 8 points, 11 rebounds at 6 assists para sa tropa ni mentor Jeffrey Cariaso.

Binanderahan ni Amer ang ratsada ng Bolts sa third quarter kung saan nagsalpak siya ng apat na triples para iwanan ang Aces sa 62-46 patungo sa pagtatayo ng 18-point lead, 52-70, sa huling 2:35 minuto nito.

Saglit itong napababa ng Alaska sa 61-72 pagpasok ng final canto bago kumamada ang Meralco para itala ang 26-point advantage, 90-64, mula sa basket ni Raymond Almazan sa 6:16 minuto nito.

Nagdagdag si Almazan ng 15 points para sa Bolts, habang may 9 markers si Chris Newsome.

Binanderahan naman nina guards Chris Banchero at Simon Enciso ang Aces mula sa kanilang tig-12 points.