PVL girls Under-12 tournament bukas na

MANILA, Philippines — Sa unang pagkakataon ay magdadaos ang Premier Volleyball League (PVL) ng girls under-12 tournament na magsisimula bukas sa St. John Institute sa Bacolod City.

Ang Premier Volleyball League Youth Festival ay katatampukan ng 16 na koponan sa buong lalawigan ng Negros Occidental.

Sasalang sa PVL Youth Festival ang ilang tropa mula sa Pulupandan, San Carlos, Bago City at Silay maging ang Bacolod-based schools na USLS, Tay Tung, SJI at Bago.

“This is in the effort of growing the local talent for volleyball and create an avenue for more opportunities for the young through playing sports,” sabi ni Bea Tan, event organizer.

Ang development na ito ay bahagi ng pagbisita ng liga sa probinsiya para pagbigyan ang ilang fans na mapanood ng personal ang kanilang mga iniidolo.

Maghaharap sa Oktubre 13 sa University of Saint La Salle ang Creamline at PetroGazz bandang alas-4 ng hapon matapos ang labanang PacificTown-Army at BanKo Perlas sa alas-2.

Bukod sa mga laro, magkakaroon din ng coaching seminars mula Oktubre 11-12 at mall tour ng mga manlala-ro mula sa Creamline, PetroGazz at PacificTown-Army na gaganapin sa Ayala Capitol.

Magsasanib-puwersa naman ang PVL at ang sports promoter na GRID Athletic Sport para magbigay ng seminars, grassroots volleyball workshops at motivational speeches mula sa ilang mga volleyball player.