Obiena aabangan sa Sea Games

MANILA, Philippines — Matapos ang kabi-kabilang tagumpay sa mga torneo sa Europe sa nakaraang dalawang buwan, ang gold medal naman sa darating na 30th Southeast Asian Games ang puntirya ni world-class Filipino pole vaulter Ernest John Obiena.

Dahil sa isang ACL injury na kanyang nakuha sa ensayo isang araw bago magtungo sa Kuala Lumpur, Malaysia ay hindi nakalaro si Obiena noong 2017 SEAG.

Sumailalim si Obiena sa seven-month rehabilitation period kasunod ang intense training sa Formia, Italy sa ilalim ni Vitaly Petrov, ang coach ni pole vault legend Sergei Bubka.

Ang pagsasanay ni Obiena ay sagot ng Philippine Sports Commission.

“We are monitoring EJ’s (Obiena) progress,” wika ni PSC chairman William ‘Butch’ Ramirez. “Athletics, being a centerpiece event of the SEA Games, was infused with government support as usual in the international events where our athletes take part in.”

Nakita ni Ramirez ang pagsisikap at pagpupursige na ginawa ni Obiena.

“And lately, EJ has proved himself more in his desire to chase his SEA Games dream. We, in the PSC, are with him. Let us support EJ and the other Filipino athletes,” sabi ng Chef De Mission ng Team Philippines sa 2019 SEA Games.

Kamakailan ay pumasok si Obiena sa World Top 10 Pole Vault rankings sa kanyang mga panalo sa 2019 Summer Universiade sa Napoli, Italy matapos magposte ng 5.76m.

Isa pang gold medal ang inangkin ni Obiena matapos maglista ng 5.81m sa Men’s Pole Vault competition ng Salto Con L’asta sa Piazza Chiari 2019 sa Italy.

Ang kanyang panalo sa Chiari ang naghirang sa kanya bilang unang Filipino athlete na nag-qualify para sa 2020 Tok-yo Olympic Games.

“I’m just trying to look forward and see what there is this year, what happened this year, how good this year has been, “ sabi ni Obiena.

Samantala, matapos ang 12 taon ay ibabalik sa kalendaryo ang beach handball na idaraos sa Disyembre 7-11 sa Subic Bay International Tennis Center sa Olongapo, Zambales.

Isasabak ng bansa ang 12 players sa pamumuno ni Fil-Iranian goalkeeper Daryoush Zandi at gagabayan ni national coach Joanna Franquelli.