Chabi Yo, Kouame dikit ang laban
MANILA, Philippines — Dikdikan sina Soule-mane Chabi Yo ng University of Santo Tomas at Angelo Kouame ng Ateneo de Manila University sa MVP race ng UAAP Season 82 men’s basketball tournament.
Hawak ni Chabi Yo ang No. 1 spot matapos makalikom ng 82.71 statistical points (SPs) matapos magtala ng averages na 19.9 points, 15.3 rebounds, 1.6 assists, 0.6 steals at 0.9 blocks. Mayroon itong kabuuang 139 points, 107 rebounds, 11 assists, apat na steals at anim na blocks sa pitong laro ng Growling Tigers na kasalukuyang may 4-3 baraha sa pagtatapos ng first round.
Nakadikit naman si Kouame na may 81.43 SPs tangan ang averages na 14.0 points, 13.1 rebounds, 1.1 assists, 1.3 steals at 4.9 blocks per contest para pamunuan ang Blue Eagles na makopo ang 7-0 sweep sa first round.
Nagtala si Kouame ng 98 points, 92 boards, walong assists, siyam na steals at impresibong 34 blocks sa pitong laro.
Pasok naman sa Top 5 sina Bright Akhuetie at Kobe Paras ng University of the Philippines, at Alex Diakhite ng University of the East.
Malayo si Akhuetie na may 69 SPs (102 points, 84 rebounds, 12 assists, 12 steals at anim na blocks) habang may 65.2 SPs si Paras mula sa 92 points, 28 rebounds, pitong assists, limang steals at 10 blocks, at 64.83 SPs naman si Diak-hite buhat sa 92 points, 76 rebounds, 11 assists, limang steals at 10 blocks.
Nasa ikaanim si Rey Suerte ng UE (62.29) kasunod sina Jamie Malonzo ng De La Salle (61.5), Justine Baltazar ng La Salle (58.57), Thirdy Ravena ng Ateneo (57.71) at Lenda Douanga ng Adamson (56.86).
Nangunguna sa Rookie of the Year race si Mark Nonoy ng UST.
- Latest
