Mananalo sa Spence-Porter fight sasagupa kay Pacquiao

MANILA, Philippines — Hindi lang korona ang paglalabanan nina In­ternational Boxing Fe­deration welterweight king Errol Spence at World Boxing Council wel­­terweight titlist Shawn Porter sa kanilang unification bout ngayong araw sa Staples Center sa Los An­geles, California.

Nakataya rin ang ka­rapatang makaharap si Filipino world eight-divi­sion champion Manny Pac­quiao na nag-aabang kung sino kina Spence at Porter ang mananalo para sa kanyang susunod na laban sa Enero.

Tumimbang si Spence ng 147 pounds, habang 146.5 pounds si Porter.

Hindi pa man nagku­krus ang landas ng dala­wa sa ibabaw ng ring ay mainit na ang bangayan ni­na Spence at Porter.

Handa si Spence na ga­win ang lahat para pigilan si Porter at maagaw ang WBC belt na matagal na nitong inaasam.

“I know he’s a tough fighter, he’s gonna come to fight. But like I said, I’m gonna break his will and I’m gonna be the first per­son to stop Shawn Por­ter,” ani Spence.

Binantaan naman ni Por­ter si Spence na ma­ging preparado sa bagsik ng kanyang kamao.

“He’s gonna come rea­dy for the fight and I’m gonna come ready for the fight. Listen, y’all are in for a treat. Him and I, best of the best, about to get in the ring and do it. He’s got all the tools, I got all the tools. My tools better than his? His tools better than mine? Y’all about to find out. Great fight,” wika ni Porter.

Anuman ang maging re­sulta ng laban ay pa­re­hong magbubulsa ng tig-$2 milyon sina Spence at Por­ter.

Madaragdagan pa ito base sa hatian sa pay-per-view ng laban.

Ngunit maliit lamang ito kumpara sa kanilang ma­tatanggap kung makakalaban si Pac­quiao na tunay na tuma­tabo sa takilya sa oras na tu­mutungtong sa ibabaw ng ring.

“He’s a guy who will fight anybody, anywhere, anytime,” sabi ni Spence kay Pacquiao.