F2 Logistics sisimulan ang pagdedepensa sa PSL crown
MANILA, Philippines – Sisimulang depensahan ng F2 Logistics ang kanilang korona sa 2019 Philippine Superliga Invitational Conference laban sa 2018 runner-up at kontrapelong Petron Blaze sa Ynares Sports Arena sa Pasig City.
Magtutuos ang Cargo Movers at Blaze Spikers ngayong alas-4 ng hapon.
Gagamiting bentahe ng F2 Logistics ang kanilang championship stint sa nakaraang All-Filipino Conference para sa kampanya sa maiksing komperensyang ito.
Ibabandera ng Cargo Movers si All-Filipino Most Valuable Player Kalei Mau kasama ang ilang national team members na si Aby Maraño, Majoy Baron at Dawn Macandili katuwang din sina Ara Galang, Kim Fajardo at Kim Dy.
Sa panig naman ng Blaze Spikers ay mawawala sa line-up nila ang isa sa kanilang ace player na si Mika Reyes dahil sa right knee injury na ininda na nakuha niya noong All-Filipino Conference.
Sa pagkakawala ni Reyes ay sasandalan ng Petron ang malalim nilang hanay sa pangunguna nina Ces Molina, Aiza Maizo-Pontillas, Sisi Rondina, Rhea Dimaculangan, Rem Palma at Denden Lazaro bukod pa sa bagong saltang University of Santo Tomas sophomore setter na si Mafe Galanza
Pormal na ring bubuksan ang Invitational Conference sa ala-1 ng hapon na katatampukan ng mga manlalaro mula sa walong koponan.
Magbabanggaan sa unang laro ang Sta. Lucia (1-0) at PLDT Home Fibr (0-1) sa alas-2 ng hapon at sa tampok na laro naman ay ang harapang Cignal (1-0) at Foton (0-1) sa alas-6 ng gabi.
- Latest