Pasay, Valenzuela wagi sa MPBL
Iloilo City, Philippines — Nalampasan ng Pasay Voyagers ang pagbangon ng Iloilo United Royals sa dulo ng fourth quarter para itakas ang 56-52 tagumpay sa Maharlika Pilipinas Basketball League dito sa University of San Agustin Gym kamakalawa ng gabi.
Nakadikit ang Royals sa 52-54 matapos ang split ni Eric Rodriguez bago isinalpak ni Axel Iñigo ang dalawa niyang free throws para selyuhan ang pang-pitong panalo ng Voyagers at itaas ang baraha nila sa 10-5 sa North division ng 31-team Lakan Season.
Nakabawi ang Iloilo mula sa 14-point deficit, 30-44, para makalapit sa 50-51 matapos ang inihulog na 9-1 bomba sa pamumuno ni Ryan Arambulo.
Isang three-point shot ni Elvis Chan ang naglayo sa Pasay sa 54-51 sa huling 3:17 minuto ng labanan.
Tumapos si Iñigo na may 12 points, 8 rebounds, 5 assists at 2 steals para sa Voyagers, habang may 12 markers si Elmar Moradas.
Nakahugot naman ang Royals, nahulog sa 8-6 baraha, ng 12 points kay Arambulo.
Samantala, tinalo ng Valenzuela Classic-SPV Top Marketplace ang Mindoro Tamaraws, 67-59.
Nagtala ng double-double na 13 points at 13 rebounds si Jaymar Gimpayan at nagdagdag ng 12 markers, 8 rebounds at 8 assists si Paolo Hubalde para sa 6-10 marka ng Classic.
Darayo ang MPBL, itinatag ni Sen. Manny Pacquiao, sa Bacolod City para sa upakan ng Basilan Steel at Davao Occidental Tigers ngayong alas-6:30 ng gabi at bakbakan ng Bacolod at Soccsksargen Marlins sa alas-8:30.
- Latest
