Knockout ang kailangan ni Casimero

MANILA, Philippines — Isang knockout win at huwag ibigay sa mga hurado ang desisyon.

Ito ang kailangan ni Filipino challenger Johnriel Casimero sa kanyang paghahamon kay World Boxing Organization bantamweight champion Zolani Tete ng South Africa sa Nobyembre 23 sa London.

Nanalo ang Queensberry Promotions ni Frank Warren, kumatawan kay Tete, sa kanilang purse bid laban sa TGB Promotions ng kampo ni Casimero.

Inihayag ni WBO president Paco Valcarcel na naglatag ang Queensberry Promotions ng bid na $301,000 kumpara sa $258,500 ng TGB Promotions para makuha ang karapatang pamahalaan ang upakan nina Tete at Casimero.

Hangad ni Casimero ang kanyang ikatlong world boxing title matapos maghari sa flyweight at super flyweight divisions.

Hindi na bago sa 29-anyos na si Casimero, may bitbit na 28-4-0 win-loss-draw ring record kasama ang 19 KOs, ang lumaban sa London matapos kunin ang 10th-round TKO win kontra kay Charlie Edwards para mapanatiling hawak ang kanyang International Boxing Federation flyweight crown noong 2016.

Nagmula si Casimero sa 10-round stoppage kay Mexican Cesar Ramirez para patuloy na isuot ang kanyang WBO bantamweight interim title noong Agosto 24 sa San Andres Multi-Sports Complex.

Ang nasabing panalo ang nagtakda sa paghahamon ni Casimero sa 31-anyos na si Tete (28-3-0, 21 KOs).

Malaki ang tsansa ni Casimero na agawin kay Tete ang WBO bantamweight belt dahil noong nakaraang taon pa huling lumaban ang South African. Ito ay nang talunin ni Tete si Mikhail Aloyan sa quarterfinals ng 2018 World Boxing Super Series.

Umatras si Tete na labanan si Nonito’the Filipino Flash’  Donaire, Jr. sa semifinals ng nasabing torneo bunga ng shoulder injury. (RC)