Mapua nalusutan ang Letran sa double OT

MANILA, Philippines – Nangailangan ng dalawang overtime periods ang Mapua Cardinals upang malusutan ang Letran Knights, 105-101 kahapon sa ikalawang laro ng Season 95 NCAA basketball tournament sa FilOil Flying V Arena sa San Juan City.

Umiskor si Noah Lugo ng career-high na 31 puntos upang iakyat ang Cardinals sa solo sixth spot sa 4-6 win-loss kartada at ibaba ang Knights sa 7-4.

“Tinatrabaho talaga ng players, especially ‘yung execution ng offense at defense namin. Hindi bumigay sa overtime, unang overtime, pangalawang overtime, hanggang nag-cramps, pero nandoon at lumaban. Congratulations na lang sa both teams dahil maganda talaga ang pinakita nila,” sabi ni Mapua coach Randy Alcantara.

Samantala, pinataob ng Jose Rizal Heavy Bombers ang Emilio Aguinaldo Generals, 69-63 sa unang laro para manatiling buhay ang pag-asa na makapasok sa playoff round.

Umani ng 16 puntos sa 50 porsyentong shooting sa field goal si Agemm Miranda habang 13 puntos naman mula kay Marwin Dionisio na may kasamang 16 rebounds upang putulin na ang three-game losing skid ng Heavy Bombers.

Bukod kay Miranda, tumulong din ng 11 puntos, tatlong rebounds at dalawang assists si RY De la Rosa para buhayin ang pag-asang makapasok sa Final Four sa kanilang 4-7 win-loss kartada.

 Sa juniors’ division, wagi ang Letran Squires kontra sa Mapua Red Robins, 82-78, habang tinambakan naman ng Jose Rizal Light Bombers ang EAC Brigadiers, 78-57.