Marcial pasok sa 2nd round

MANILA, Philippines – Nagpakilala agad si reigning Southeast Asian Games champion Eumir Felix Marcial para makasiguro ng puwesto sa second round ng prestihiyosong 2019 AIBA World Boxing Championships na ginaganap sa Yekaterinburg, Russia.

Gamit ang malalim na karanasan at solidong kamao, hindi umubra sa lakas ni Marcial ang Ecua-dorian pug na si Bryan Angulo para makuha nito ang kumportableng 4-0 panalo sa first round ng men’s middleweight (75 kgs.) division.

Nakuha ni Marcial ang boto ng mga hurado mula South Korea (29-27), Turkey (30-26), Uzbekistan (29-27) at Finland (30-26) habang nakita ng judge mula sa Canada ang laban bilang tabla (28-28).

Mapapalaban si Marcial sa second round dahil makakaharap nito si second seed Tarika Allali ng Morocco na sariwa pa matapos mabigyan ng first-round bye.

Si Marcial ang ikalawang Pinoy pug na nakapasok sa second round matapos unang umabante si Carlo Paalam na nabigyan ng opening-round bye sa men’s flyweight class (52 kgs.).

Nakatakda naman ang laban ni Kuala Lumpur SEA Games gold medalist John Marvin kontra kay Pavilius Julevas ng Lithuania sa first round ng men’s light heavyweight (81 kgs.) kagabi.

Sa kabilang banda, sisimulan ni Ian Clark Bautista ang kampanya nito ngayong araw kung saan makakaharap niya si Viliam Tanko ng Slovakia sa first round ng men’s fea-therweight (57 kgs.).

Kasama rin sa delegasyon si James Palicte na sasabak laban kay Jose Manuel Wafara ng Colombia sa men’s light welterweight (63 kgs.) bukas (Huwebes) sa torneong nilahukan ng mahigit 300 boxers mula sa may 70 bansang miyembro ng International Boxing Association (AIBA).

Target ng mga Pinoy boxers na makasungkit ng silya sa 2020 Olympic Games sa Tokyo, Japan.