Rain or Shine pinatumba ang Phoenix sa tune-up

MANILA, Philippines — Ipinalasap ng Rain or Shine sa Phoenix ang ikatlong sunod na pagka­talo sa tune-up games bilang bahagi ng kanilang paghahanda sa 2019 PBA Governors’ Cup.

Namuno para sa 103-90 panalo ng Elasto Painters ang balik-import na si Joel Wright sa naitala niyang 33 points sa kanyang unang tune-up match kasama ang ba­gong koponan.

Unang nagsilbing import para sa Star Hotshots si Wright noong 2016 PBA Governor’s Cup.

Sumuporta naman sa kanya si Ping Excimi­niano na kumubra ng 16 mar­kers sa kanya ring unang laro bilang pina­ka­bagong Elasto Painter.

Nakuha ng E-Painters si Exciminiano at ang first pick sa 2019 PBA Rookie Draft mula sa Alaska kapalit si Mave­rick Ahanmisi.

Si top deputy Chris Ga­vina ang gumabay sa Rain or Shine dahil nasa China pa si chief tactician Caloy Garcia na nagsisilbi bilang top assistant naman ni Gilas Pilipinas coach Yeng Guiao sa 2019 FIBA World Cup.

Sa panig naman ng Fuel Masters, ito ang kan­ilang ikatlong sunod na kabiguan matapos lumuhod sa Meralco Bolts, 91-114 at sa NLEX Road Warriors, 77-114, no­ong na­karaang linggo.

Tumabo ng 26 points si resident import Eugene Phelps sa pagkatalo ng Phoenix.

Magbubukas ang season-ending conference sa Setyembre 20.