Parañaque giniba ang Batangas; Pasay at Rizal nagwagi rin
BATANGAS CITY, Philippines — Bumalikwas ang Parañaque Patriots mula sa naunang kabiguan matapos kunin ang 61-57 panalo laban sa host Batangas City Athletics sa MPBL Lakan Season kamakalawa ng gabi dito sa Batangas City Coliseum.
Nagsalpak si Jemal Vizcarra ng 15 points, kasama rito ang krusyal na baskets sa huling 40 segundo ng laro, para sa Patriots at makabangon buhat sa 53-point loss sa Bacoor Strikers.
Ang kabiguan naman ang tumapos sa three-game winning streak ng Athletics.
Ito ang ikaapat na panalo ng Parañaque sa 13 laro.
Ang jumper ni Vizcarra bago tumunog ang 24-shot clock violation ang nagbigay sa Patriots ng 60-55 bentahe na pumigil sa tangkang paglapit ng Athletics.
Samantala, umiskor naman ng magkahiwalay na panalo ang Pasay Voyagers at Rizal.
Pinatumba ng Voyagers ang Nueva Ecija-MiGuards, 75-69, para dumiretso sa kanilang ika-limang sunod na pananalasa.
Binanderahan ni Jan Jamon ang Pasay, pinaganda ang baraha sa 8-5, mula sa kanyang 13 points.
Nagdagdag si Raymond Ilagan ng 12 markers at kumolekta si Dhon Reverente ng 10 points at 11 rebounds.
Tinakasan naman ng Rizal ang Bacolod City, 89-84.
- Latest
