Batangas asam ang Win No. 4 laban sa Parañaque
MANILA, Philippines — Pupuntiryahin ng Batangas City Athletics ang kanilang ikaapat na sunod na panalo sa pagsagupa sa Parañaque Patriots sa 2019 MPBL Lakan Season.
Magtutuos ang Athletics at Patriots ngayong alas-8:30 ng gabi sa Batangas City Coliseum.
Paboritong manalo ang Batangas City na sumasakay sa three-game winning run laban sa Parañaque (3-9) na nahulog sa apat na sunod na kamalasan sa Northern Division na torneong itinatag ni Sen. Manny Pacquiao katuwang si PBA legend Kenneth Duremdes bilang Commissioner.
Hangad ng Athletics na mapaganda ang bitbit nilang 6-3 baraha sa Southern Division ng regional amateur basketball league.
Maglalaro naman ang Patriots na wala si Mike Saguiguit, napatawan ng one-game suspension at multang P10,000 dahil sa kanyang unsportsmanlike behavior sa kanilang laro ng Bacoor Strikers kung saan nila nalasap ang 53-point loss.
Sa alas-6:30 ng gabi ay magsusukatan naman ang Pasay Voyagers at Nueva Ecija MiGuards.
Naipanalo ng Voyagers ang kanilang huling apat na laban, habang tatlong dikit na kabiguan ang natikman ng MiGuards.
Maghaharap naman sa unang laro sa alas-4 ng hapon ang Bacolod at Rizal.
- Latest
