Motolite giniba ang Army para masolo ang No. 2 spot
MANILA, Philippines — Naalpasan ng Motolite ang mas beteranong Pacific Town-Army para itarak ang ikaapat nilang sunod na panalo, 25-16, 22-25, 25-18, 23-25, 15-10, sa Premier Volleyball League (PVL) Season 3 Open Conference kahapon sa The Arena sa San Juan City.
Nagpakitang-gilas si Myla Pablo na nagrehistro ng 24 points mula sa 23 attacks katuwang si Isa Molde na tumipa ng 19 markers at 11 excellent receptions.
Napatatag ng Motolite ang kapit nito sa solo second spot ng leader board tangan ang 4-2 record.
“At fourth set, at some point we thought that we had it but they came back strongly but what I can say that I’m happy my team played well,” sabi ni coach Godfrey Okumu sa Pacific Town-Army.
“I hope as time goes by we can get the same experience as the Army had,” dagdag pa nito.
Tabla sa 1-1 ang laro at bumirada ang Motolite pagdating ng third sa pagposte ng 18-12 bentahe bago tuluyang angkinin ang set.
Ngunit nag-iba ang kuwento pagpasok ng fourth set.
Kontrolado ng Motolite ang laro bitbit ang 15-11 kalamangan bago uminit sina veterans Jovelyn Gonzaga at Nene Bautista para kunin ang 20-23 abante bago ihatid sa deciding set ang laro.
Sa decider ay minanduhan na ng Motolite ang laro sa 5-1 bentahe mula kina Pablo at Molde hanggang nagtuluy-tuloy sa 13-10 patungo sa kanilang panalo.
Nalasap naman ng Pacific Town-Army ang kanilang magkasunod na kamalasan sa liga bitbit ang 2-2 marka.
Naglalaro pa kagabi ang PetroGazz Angels at Philippine Air Force Lady Jet Spikers habang isinusulat ito.
Samantala, sinuwag ng UST Golden Tigresses ang TIP Lady Engineers via straight sets, 25-11, 25-9, 25-11, para mapahaba ang panalo sa tatlo at sunggaban ang liderato sa Pool B ng Collegiate Conference.
Nagtuwang sina Eya Laure at Joyce Abueg nang nagrehistro ng tig-walong puntos, habang nagparamdam si Imee Hernandez na tumipa ng pitong marka.
May 3-0 baraha ngayon ang Tigresses.
Sa iba pang laro, itinala rin ng Adamson Lady Falcons ang kanilang ikatlong sunod na ratsada matapos walisin ang minamalas na San Sebastian Lady Stags, 25-18, 25-10, 25-14.
Naiposte naman ng Letran Lady Knights ang unang panalo nang talunin Perpetual Help Lady Altas, 16-25, 24-26, 26-24, 25-18, 17-15.
- Latest