UAAP basketball siksik ang sched
MANILA, Philippines — Asahan ang mas maiksing basketball season sa UAAP Season 82 upang bigyang-daan ang pagho-host ng bansa ng 2019 Southeast Asian Games na gaganapin sa Nobyembre 30 hanggang Disyembre 11 sa iba’t ibang panig ng Pilipinas.
Kung dati ay dalawang laro lamang ang pinaglalabanan tuwing Miyerkules, gagawin itong tatlo upang mas mapabilis at maagang matapos ang torneo.
Nakatakda ang opening ceremonies sa Setyembre 1 ngunit lalarga ang basketball competitons ng pinakaprestihiyosong collegiate league sa bansa sa Setyembre 4 sa Smart Araneta Coliseum.
Unang masisilayan ang triple-bill tampok ang bakbakan ng reigning champion Ateneo de Manila University at Season 81 semifinalist Adamson University sa alas-4.
Hahataw din ang duwelo ng University of Santo Tomas at University of the East sa alas-10:30 ng umaga kasunod ang engkuwentro ng Season 81 runner-up University of the Philippines at Far Eastern University sa alas-12:30 ng tanghali.
Maagang matutunghayan ang inaabangang rivalry ng Ateneo at De La Salle University na sasambulat sa Setyembre 8 sa Big Dome sa alas-4.
Bago ang Blue Eagles-Green Archers match, nakatakda ang laban ng University of the East at FEU sa alas-12 ng tanghali.
Gaya ng dati, hiwalay ang tiket sa laban ng Ateneo-La Salle at UE-FEU.
Magtatagpo naman sa rematch ng Season 81 finals ang Ateneo at UP sa huling araw ng first round ng eliminasyon sa Set-yembre 29 sa Araneta.
Maliban sa Smart Araneta at Mall of Asia Arena na regular na venues ng liga, may mga laro rin sa Ynares Sports Center sa Antipolo City sa Setyembre 21 at 22.
Karaniwan nang natatapos ang UAAP basketball tuwing Disyembre.
Ngunit tiniyak ng UAAP Management Committee na pamumunuan ni Commissioner Rebo Saguisag na tatapusin ang liga bago ang SEA Games dahil kasama ang Smart Araneta Coliseum at MOA Arena sa mga official venues ng biennial meet.
- Latest