Mojdeh nilangoy ang ginto sa Hong Kong Open
MANILA, Philippines — Isinalba ni Swimming Pinas standout Micaela Jasmine Mojdeh ang kampanya ng Pilipinas matapos masungkit ang nag-iisang gold medal ng national team sa 2019 Hong Kong Open Swimming Championships sa Victoria Park Swimming Pool sa Cuaseway Bay, Hong Kong.
Sa huling araw ng kumpetisyon ay inilabas ng 13-anyos na si Mojdeh ang kanyang bangis matapos magtala ng dalawang minuto at 20.01 segundo upang matamis na kubrahin ang ginto sa women’s 200-meter butterfly.
“Saving the best for last. Gold for the Philippines. What a proud moment for this young girl who at only 13 years old was able to win a gold in the National Hong Kong Open Championship. She said she never wanted to go home without bringing any medal for the Philippines,” wika ni Swimming Pinas team manager Joan Mojdeh.
Tinalo ng Brent International School student ang kababayang si Rasalee Santa Ana na nagtala ng 2:20.06 at si Sounthorncho Suipasuta ng Thailand na naglista naman ng 2:20.91.
Nagpasalamat naman si Mojdeh sa kanyang mga coaches na sina Alex Papa, Marlon Dula at Virgie de Luna na pangunahing gumagabay sa kanyang mga laban gayundin sa yumaong si Philippine Swimming League president Susan Papa.
“Talagang nami-miss na niya si coach Susan. Sabi niya iba pa rin daw talaga kapag si coach Susan ‘yung nagbibigay sa kanya ng instructions every time na lalaban siya. We want to dedicate this victory to her,” dagdag ni Joan.
Sa panalo ni Mojdeh ay higit na lumakas ang tsansa niyang makapasok sa national team na sasabak sa darating na 2019 Southeast Asian Games na idaraos sa New Clark City sa Nobyembre 30 hanggang Disyembre 11.
Kasama ni Mojdeh sa Hong Kong meet sina Jules Mirandilla, Jordan Ken Lobos, Marcus De Kam, John Neil Paderes at Yohan Cabana na nagtala ng personal best sa kani-kanilng events.
Kumuha si Olympian Jasmine Alkhaldi sa tatlong pilak at isang tanso at nagbulsa si Sacho Ilustre ng isang pilak at isang tanso.
- Latest
