Castro mas gusto ang PBA crown
MANILA, Philippines — Walang saysay ang Best Player of the Conference award ni Jayson Castro kung hindi makukumpleto ang misyon ng TNT Katropa na masikwat ang 2019 PBA Commissioner’ s Cup championship.
Iyan ang sinabi ng 33-anyos na point guard matapos maibulsa ang tropeo sa mid-season conference.
“Siyempre, masaya ako. Pero siyempre, number one goal din namin is makuha ‘yung championship,” ani Castro na siyang hinirang na BPC sa unang pagkakataon sa loob ng tatlong taon simula nang huling magwagi noong 2019 Governors’ Cup.
Nakuha ito ng Pampanga native matapos dalhin sa PBA Finals ang Tropang Texters matapos noong 2017 Commissioner’s Cup sa likod ng kanyang impresibong averages na 15.6 points, 5.3 rebounds, 6.4 assists at 1.8 steals.
Nakaipon si Castro ng 1077 points upang daigin si June Mar Fajardo (762 points) ng San Miguel gayundin ang mga rookies na na sina Ray Parks (576) ng Blackwater, CJ Perez (428) ng Columbian at Robert Bolick ng Northport (421).
Ito na ang ika-limang BPC ni Castro upang makatabla si Danny Ildefonso sa ikalawang puwesto ng may pinakamaraming parangal sa kasaysayan, sa likod ni Fajardo na may walong BPCs.
Sa kabila nito ay sa korona ng PBA Commissioner’s Cup nakatuon ang atensyon ni Castro.
“Ang tagal na rin naming hindi nagcha-champion. Sila lagi ang nagcha-champion eh. Sana kami naman,” ani Castro sa San Miguel.
- Latest
