Best Player of the Conference si Jayson Castro

MANILA, Philippines — Pangatlo siya sa karera para sa Best Player of the Conference award ng 2019 PBA Commissioner’s Cup ngunit dahil sa kanyang itinalang mga numero ay nakamit ni Jayson Castro ng TNT Katropa ang BPC trophy kagabi bago ang Game Four ng PBA Finals sa Smart Araneta Coliseum.

Humakot si Castro ng 1,077 points mula sa nakuhang 393 points sa statistics, 458 points sa media votes, 76 points sa player votes at 150 points sa PBA Commissioner’s Office.

Ito ang pang-limang BPC trophy ni Castro katabla si two-time PBA MVP Danny Ildefonso sa ikalawang puwesto sa ilalim ng walo ni five-time PBA MVP June Mar Fajardo ng San Miguel. Huling nanalo si Castro ng BPC award noong 2016 Governors’ Cup.

Huling naghari sa PBA ang TNT Katropa noong 2015 PBA Commissioner’s Cup laban sa Rain or Shine.

Kumamada ang six-time PBA champion ng mga averages na 20.3 points, 5.3 rebounds at 7.3 assists sa PBA Finals.

Tinalo ni Castro, produkto ng Philippine Christian University at ang No. 3 overall pick noong 2008 PBA Draft, para sa BPC trophy sina rookies Bobby Ray Parks, Jr. ng Blackwater, CJ Perez ng Columbian, Fajardo at Robert Bolick ng NorthPort.

Bumandera si Parks sa karera sa kanyang 37.2 Statistical Points kasunod sina Perez (36.1), Castro (33.7), Fajardo (32.9) at Bolick (32.46).

Nabigo sina Parks, Perez at Bolick na maipasok sa PBA Finals ang kanilang mga koponan.

Samantala, nakamit naman ni Terrence Jones ng Tropang Texters ang Best Import award.

Nakakuha si Jones ng 1,254 points mula sa 548 points sa statistics, 477 points sa media votes, 79 points sa player votes at 150 points sa PBA Commissioner’s Office.

Humakot si Jones, isang six-year NBA ve-teran, ng mga averages na 31 points, 15.5 rebounds at 7.6 assists sa elimination round at tumipa ng 35.3 points per game sa PBA Finals.

Habang sinusulat ang balitang ito ay naglalaban pa ang San Miguel at TNT Katrapa sa Game-4 ng Finals kagabi.