Mayweather naghahanda sa rematch kay Pacquiao?

MANILA, Philippines — Tila nagpaparamdam na si undefeated Ame­rican fighter Floyd Mayweather, Jr. na magbabalik siya sa boksing dahilan upang lumakas ang tsansang matuloy ang inaabangang re­match nila ni world eight-division champion Manny Pacquiao.

Sa kanyang Insta­gram post ay nakitang nag­sisimula nang mag-ensayo si Mayweather sa isang boxing gym.

Ipinamalas ni Mayweather ang kanyang hu­say sa punching ball kung saan kita pa rin ang matikas niyang por­ma.

Naka-tag sa naturang post ang Mayweather Promotions kaya’t na­buhayan ng dugo ang mga boxing fans sa po­si­bilidad na matuloy ang Pacquiao-Mayweather mega bout.

Huling nasilayan sa aksyon si Mayweather sa isang professional competitive boxing no­ong 2015 nang itala nito ang unanimous decision win laban kay Andre Berto sa MGM Grand Gar­den Arena sa Las Ve­­gas, Nevada.

Ito ang huling taon na nakahawak si Mayweather ng world title - ang World Boxing Council welterweight belt at ang World Bo­xing Association super welterweight title na ka­salukuyang hawak ni Pacquiao.

Matapos nito, tinalo ni Mayweather si Conor McGregor noong 2017 via 10th-round technical knockout kasunod ang exhibition match laban kay Tenshin Nasukawa noong nakaraang taon.

Kaya naman balik na sa ensayo si May­wea­ther na posibleng pag­hahanda sa rematch kay Pacquiao na inaasahang tatabo sa takilya at kikita ng milyun-milyong dol­yares sakaling matuloy.

Pormadung-pormado si Pacquiao na sariwa pa sa split decision win kontra kay Keith Thurman para makuha ang WBA super welterweight title noong na­ka­­raang buwan sa MGM Grand Garden Arena.

Nauna nang inihayag na handa si Pacquiao na muling harapin si Mayweather.