Ikatlong dikit na panalo hahatawin ng Lifesavers
MANILA, Philippines — Pakay ng Generika-Ayala Lifesavers na irehistro ang ikatlong sunod na panalo, habang pilit namang babangon mula sa kabiguan ang PLDT Home Fibr Power Hitters sa 2019 Philippine Superliga All-Filipino Conference sa The Arena sa San Juan City.
Ngayong alas-7 ng gabi ang bakbakan ng dalawang tropa sa second round ng eliminations.
Sasamantalahin ng Lifesavers ang tangan nilang momentum matapos ang kanilang five-set victory kontra sa Cignal HD Spikers noong nakaraang Sabado.
Tinakasan ng Generika-Ayala ang Cignal sa likod ng kanilang 26-24, 19-25, 26-24, 18-25, 16-14 panalo para mas mapatibay ang pagkapit sa solo third spot hawak ang 8-5 baraha.
Hindi pa rin makakapaglaro para sa tropa si Angeli Araneta kaya’t aasahan muli ni coach Sherwin Meneses na magdeliber sa kanila sina sa Fiola Ceballos, Patty Orendain, Jaime Lavitoria, Me’ann Mendrez at Ria Meneses.
Samantala, susubukan naman ng Power Hitters na makabawi matapos silang paluhurin ng Cignal HD Spikers noong Martes sa kanilang five-set thriller match sa Muntinlupa Sports Center.
Hindi bumitaw ang koponan ni multi-titled mentor Roger Gorayeb sa nasabing laro.
Ngunit sadyang handa ang HD Spikers na takasan sila at ipalasap ang 25-23, 20-25, 16-25, 25-23, 9-15 kabiguan.
Babanderang muli para sa Power Hitters ang kanilang core sa pangunguna nina Gretchel Soltones, Aiko Urdas, Shola Alvarez, Jerilli Malabanan, Gen Casugod at Jasmine Nabor.
Sa pagtatapos ng second round eliminations ay tutungo ang lahat ng tropa sa knock quarterfinals kung saan ang maghaharap ang No. 1 at No. 8, ang No. 2 at No. 7, ang No. 3 at No. 6 at ang No. 4 at No. 5.
Bubuksan ang nasabing double-header sa alas-4:15 ng hapon sa pagitan ng F2 Logistics Cargo Movers at Petron Blaze Spikers.
- Latest