Troncoso magiging future star sa PSL
MANILA, Philippines — Sa pagtuldok ng Sta. Lucia Lady Realtors sa kanilang 10-game losing slump kontra sa Marinerang Pilipina noong Huwebes ay isang pangalan ang nagpakilala at dumeliber para sa tropa.
Third set nang ipinasok ng Sta. Lucia ang rookie na si Glaudine Troncoso kung saan pumalo ito ng walong puntos para tulungan ang koponan na masungkit ang ikalawa nitong panalo.
“Sinusunod ko lang ‘yung mga instruction ng mga coaches ko saka nagta-trust ako sa mga kasama, ayun magandang motivation ‘yung mga kasama ko chini-cheer nila ako kahit rookie lang ako,” wika ni Troncoso.
Tubong Iloilo ang 21-anyos na si Troncoso na unang naglaro at nahubog sa Central Philippine University (CPU) kung saan din galing si Jovelyn Gonzaga na kanyang tinulungan na masungkit ang korona sa nationals sa limang taon niyang paglalaro.
Hindi na bago sa paglalaro sa Maynila si Troncoso dahil naglaro na ito sa dating Shakey’s V League kung saan kinakatawan nila ang Western Visayas bago sumabak sa PSL.
Bago man sa professional league, nakikita na ni Sta. Lucia head coach Babes Castillo ang potensyal ni Troncoso sa mga susunod na kabanata ng kanyang karera.
“She maybe young pero makikita mo na ‘yung DNA in making of a champion,” sabi ni Castillo.
Hindi man galing sa mga prominenteng eskuwelahan sa Maynila ay malaki pa rin ang pasasalamat ni Troncoso sa tiwalang ibinigay sa kanya para maipamalas ang kakayahan niya. Fergus E. Josue, Jr.
- Latest
