Zamboanga wagi sa Pasay
MANILA, Philippines — Isa na namang come-from-behind win ang itinala ng Zamboanga matapos makabangon mula sa 12-point deficit sa huling tatlong minuto para talunin ang Pasay Voyagers, 83-82, sa MPBL Lakan Season kamakalawa ng gabi dito sa Alonte Sports Center.
Nakahugot ang Zamboanga ng magandang laro mula kay Ryan Costelo para punan ang hindi paglalaro nina key players Harold Arboleda at Joseph Nalos.
Pinamunuan ni Costelo ang pinakawalang 12-2 atake ng Zamboanga sa huling tatlong minuto ng fourth period para balikan ang Pasay.
Isang short jumper ang isinalpak ni Costelo sa natitirang 16 segundo para selyuhan ang tagumpay ng Zamboanga laban sa Voyagers na nabigo sa kanilang huling posesyon matapos ang mintis na jumper ni Jan Jamon.
Ito ang ikalawang sunod na panalo ng Zamboanga na nagtaas sa baraha nila sa 3-3.
Samantala, sumandal naman ang Biñan City Krah-Heroes sa mahusay na shooting ni Macky Acosta, kumonekta ng anim na three-point shots, para talunin ang Basilan Steel, 94-78, at pinaluhod ng Manila Stars ang Pampanga Giant Lanterns sa bisa ng 92-76 panalo.
- Latest